काठमाडौं– नेपाल कम्युनिस्ट पार्टी (बहुमत) ले प्रेस वक्तव्य जारी गर्दै अहिलेको संघीय लोकतान्त्रिक गणतन्त्रलाई दलाल पुँजीवादको नतिजा भन्दै समाजवादी गणतन्त्र स्थापनाको लागि संघर्षमा उत्रिन आह्वान गरेको छ।
महासचिव कञ्चनद्वारा जारी वक्तव्यमा भनिएको छ– संविधानको दशक लामो कार्यान्वयनको क्रममा भ्रष्टाचार, लुटतन्त्र, भाइभतिजावाद, कुशासन, विदेशी हस्तक्षेप, राष्ट्रघात र आर्थिक पराधीनता जस्ता विकृति झन् गहिरिँदै गएको छ।
वक्तव्यमा “जेनजी आन्दोलन”लाई जनविद्रोहको ज्वालामुखीको रुपमा चित्रण गर्दै २०७२ सालको संविधान सारतः अन्त्य भइसकेको दाबी गरिएको छ।
पार्टीले दलाल पुँजीवादी गणतन्त्रलाई निरन्तरता दिने सुधारका प्रलोभनहरूलाई जनतामाथि नयाँ किसिमको लुटपाट मात्र हुने आरोप लगाउँदै, अबको निर्विकल्प विकल्प समाजवादी गणतन्त्र स्थापना भएको स्पष्ट पारेको छ।
वक्तव्यमा “जननिर्वाचित कार्यकारी प्रमुख”, “विज्ञसहितको मन्त्रीपरिषद्”, “निर्वाचित न्यायपालिका”, “जनप्रतिनिधि सभा” र “शिक्षा–स्वास्थ्यमा निजीकरणको अन्त्य” लगायतका मुद्दाहरू अघि सारिएका छन्। यसलाई कार्यान्वयन गर्न तत्काल स्वाधीन संयुक्त सरकार गठन गर्नुपर्ने पार्टीको भनाइ छ।
महासचिव कञ्चनले देश–विदेशमा रहेका सम्पूर्ण देशभक्त, जनवादी, क्रान्तिकारी, सर्वहारा श्रमजीवी र उत्पीडित जनतालाई आन्दोलनमा अघि बढ्न हार्दिक अपिल गरेका छन्।
हाम्रो पहुँच संवाददाता । ४ आश्विन २०८२, शनिबार