खलंगा, ७ असार । बाटो मर्मत हुन नसक्दा बिरामीलाई बोकेर आउने एम्बुलेन्स समेत जिल्ला स्वास्थ्य कार्यालय जाजरकोटमा आउन सकेको छैन् ।
विगत तीन हप्तादेखि अविरल बर्षाको कारण हिलाम्य भई अवरुद्ध बनेको बाटोे मर्मत हुन नसक्दा उपचारका लागि स्वास्थ्य कार्यालयमा आउने बिरामीलाई करिब तीन सय मिटर टाढा नै ओर्लिएर हिड्नुपर्ने बाध्यता रहेको छ ।
उपचारका लागि आउने बिरामी, औषधी र अन्य सामग्रीलाई मानिसले बोकेर ल्याउनुपर्ने बाध्यता रहेको जिल्ला स्वास्थ्य कार्यालय जाजरकोटका निमित्त व्यवस्थापक टिकाराम जैसीले बताए ।
जिल्ला सदरमुकाममा रहेको स्वास्थ्य कार्यालयमा जाने बाटो अवरुद्ध भएपनि जिल्लाका सरोकारवाला निकायहरु मुखदर्शक भएर बसेको स्थानीयले गुनासो गरे ।
अहिले विरामीहरुलाई बोकेर अस्पताल पुर्याउने गरिएको छ । यता भेरी नगरपालिकामा प्रमुख प्रशासकीय अधिकृत दलबहादुर घर्तीले बाटो भोली (मंगलबार) बाट बनाउन शुरु गर्ने जानकारी दिए ।
उनले भने, ‘हामीले ठेकेदार संग कुरा गरिसकेका छौं, त्यहाँको बाटो बनाउन भोली देखि शुरु हुन्छ ।’
। ७ असार २०७८, सोमबार