१ फाल्गुन २०७७, शनिबार
ताजा खबर
  

मौराखारा गुरिल्ला : म्याराथनको पुरुषमा अर्जुन र महिलामा हुमी पहिलो

पुरूष तर्फ ६६ र महिला तर्फ ३४ धावककाे प्रतिस्पर्धा

‘जनयुद्ध’ दिवसको अवसरमा आयोजित मौराखारा गुरिल्ला म्याराथनको पुरुष तर्फ रुकुम पश्चिमका अर्जुन वस्नेत र महिला तर्फ प्युठानकी हुमी बुढामगर प्रथम हुनुभएको छ । रुकुम पश्चिमको सानीभेरी गाउँपालिकाले आयोजना गरेको म्याराथनमा विभिन्न जिल्लाका ६५ जना धावकहरुलाई उछिन्दै जिल्लाको सानीभेरी गाउँपालिकाका अर्जुन पुरुष तर्फ प्रथम हुनुभएको हो । उहाँले निर्धारित ४६ किलोमिटरको दुरी ४ घण्टा ३० मिनेटमा पुरा गर्नुभयो । त्यस्तै पुरुष तर्फ निर्धारित दुरी ४ घण्टा ५१ मिनेटमा पुरा गर्दै सोलुखोम्बुका सुमन कुलङ दोस्रो हुँदा रुकुम पश्चिम सानीभेरी गाउँपालिका–३, का रत्नवहादुर ओली तेस्रो र सानीभेरी ३ कै भुवन ओली शान्त्वना स्थान हाँसिल गर्न सफल हुनुभएको छ । तेस्रो हुने रत्नवहादुरले ४ घण्टा ५६ मिनेट र शान्त्वना हुने भुवनले ४ घण्टा ५९ मिनेटमा दौड पुरा गर्नुभएको थियो ।

त्यस्तै आफ्ना ३३ जना प्रतिद्धन्दिलाई पाखा लगाउँदै महिला तर्फ प्रथम हुने प्युठानकी हुमीले निर्धारित ३४ किलोमिटरको दुरी ३ घण्टा १४ मिनेटमा पुरा गर्नुभयो । बर्दियाकी कल्पना थारु दोस्रो र रुकुम पश्चिम सानीभेरी गाउँपालिका–३, कि रुपा नकाल तेस्रो हुँदा महिला तर्फ सानीभेरी गाउँपालिका ९ की मुवा भण्डारी शान्त्वना हुनुभयो । दोस्रो हुने कल्पनाले निर्धारित दुरी ३ घण्टा १७ मिनेट, तेस्रो हुने रुपाले ३ घण्टा २० मिनेट र शान्त्वना हुने मुवाले ३ घण्टा ४० मिनेटमा दुरी पुरा गर्नुभएको थियो ।

म्याराथनको नेपाल कम्युनिष्ट पार्टी नेकपाका स्थायी कमिटि सदस्य तथा पूर्व गृहमन्त्री जनादर्न शर्मा प्रभाकरले आज बिहान साढे १० बजे रिबन काटेर उद्घाटन गर्नुभएको थियो । म्याराथनमा महिला तर्फ ३४ र ६६ जनाले भाग लिएका थिए । रुकुम पश्चिम र पूर्व सहित देशका विभिन्न जिल्लाबाट सहभागिता जनाउन धावकहरु आएको म्याराथनको संयोजन गरिरहेको मौराखारा युवा क्लवले जनाएको छ । पुरुष धावकहरु ४६ किलोमिटरको रुटमा दौडिएका थिए भने महिला धावकहरुले ३४ किलोमिटर दुरी पुरा गरेका थिए ।

पुरुषतर्फ प्रथम आउने खेलाडीलाई नगद ८० हजारको साथमा ट्रफी, मेडल र प्रमाण पत्र प्रदान गरिएको छ । दोस्रो हुनेलालई ५५, तेस्रो हुनेलालई ३५ हजार र सान्त्वना हुने खेलाडीलाई नगद १० हजारका साथमा प्रमाण पत्रले पुरस्कृत गरिएको गाउँपालिकाले जनाएको छ । महिला तर्फ प्रथम हुनेले नगद ५५ हजारको साथमा ट्रफी, मेडल र प्रमाण पत्र, दोस्रो हुनेले ४०, तेस्रो हुनेले २० र सान्त्वता हुनेले १० हजार नगदको साथमा मेडल र प्रमाण पत्र प्राप्त गरेका छन् । जनयुद्ध दिवसका अवसरमा विगत ४ वर्षदेखि गाउँपालिकाले राष्ट्रिय स्तरको गुरिल्ला म्याराथन संचालन गर्दै आईरहेको छ । #कखरा#