जाजरकोट – कमजोर शैक्षिक नतिजाको दबाब झेल्दै आएको जाजरकोट अब सुधारको नयाँ यात्रामा अघि बढ्ने संकेत देखिएको छ ।

शिक्षा विकास तथा समन्वय इकाइ जाजरकोटको आयोजनामा सम्पन्न शैक्षिक गुणस्तर अभिवृद्धि सम्बन्धी अन्तरक्रिया कार्यक्रमपछि जिल्लाभरका माध्यमिक विद्यालयका प्रधानाध्यापकहरूले सामूहिक रूपमा प्रतिबद्धता जनाएका छन् ।

एसईई लगायत सबै परीक्षाको नतिजा सुधार गर्ने, विद्यालय व्यवस्थापन सुदृढ बनाउने र सिकाइको गुणस्तर उकास्ने स्पष्ट लक्ष्यसहित गरिएको यो प्रतिबद्धताले शिक्षा क्षेत्रमा नयाँ आशा जगाएको छ ।

“कागजमा होइन, व्यवहारमा सुधार चाहिन्छ”
कार्यक्रममा बोल्दै इकाइ प्रमुख यज्ञश्वर खत्रीले अब केवल योजना बनाउने समय सकिएको र परिणाम देखाउने समय आएको स्पष्ट पारे ।
“हामीले वर्षौँदेखि समस्या चिन्दै आएका छौं, तर अब समाधान कार्यान्वयन गर्ने समय हो । यो प्रतिबद्धता कागजमा सीमित हुनु हुँदैन, कक्षाकोठामा देखिनुपर्छ,” इकाइ प्रमुख यज्ञश्वर खत्री भने । उनले शिक्षक, विद्यालय र स्थानीय तहबीच समन्वय बढाउँदै जिम्मेवारीपूर्ण कार्यान्वयनमा जोड दिनुपर्ने बताए ।

नतिजा सुधारका ठोस उपाय
प्रतिबद्धता अनुसार विद्यालयहरूले अब अघिल्लो नतिजाको विश्लेषण गर्दै सुधारका लागि योजनाबद्ध काम गर्नेछन् । अतिरिक्त कक्षा, कोचिङ, मोडल टेस्ट, अनलाइन सिकाइ र निरन्तर मूल्यांकनलाई प्रभावकारी बनाइनेछ ।
परीक्षा प्रणालीलाई मर्यादित बनाउन मोबाइल निषेध, चिटिङ नियन्त्रण र ७५ प्रतिशत हाजिरी अनिवार्य गर्ने कडाइसमेत लागू गरिनेछ ।

व्यवस्थापन र अनुशासनमा कडाइ
विद्यालयभित्र स्पष्ट जिम्मेवारी बाँडफाँड, शिक्षक क्षमता विकास, वार्षिक योजना निर्माण र कार्यान्वयनमा जोड दिइनेछ । साथै सरसफाइ, पूर्वाधार सुधार र स्थानीय स्रोतको उपयोग मार्फत विद्यालय वातावरणलाई व्यवस्थित बनाउने लक्ष्य लिइएको छ ।

गुणस्तरीय शिक्षातर्फ नयाँ मोड
नयाँ पाठ्यक्रम कार्यान्वयन, आईसिटी प्रयोग, शिक्षण सामग्रीको प्रभावकारी उपयोग, विद्यार्थीको प्रतिभा पहिचान र प्री सिकाई जस्ता अभ्यासलाई विस्तार गरिनेछ ।

व्यवहारिक सुधारका पहल
सेनिटरी प्याड उपलब्धता, दिवा खाजा व्यवस्थापन, गुनासो सुनुवाइ, समयमै पाठ्यपुस्तक वितरण र इमिस प्रणाली अद्यावधिक गर्ने कामहरूलाई प्राथमिकतामा राखिएको छ ।

अब परीक्षण कार्यान्वयनको
कागजमा हस्ताक्षरित प्रतिबद्धता अब व्यवहारमा कत्तिको रूपान्तरण हुन्छ भन्ने नै मुख्य प्रश्न हो। विगतका अनुभवले चुनौती देखाए पनि यसपटकको एकीकृत प्रयासले सकारात्मक संकेत दिएको छ ।

शैक्षिक सुधारको अध्याय
जाजरकोटको शिक्षा क्षेत्रमा यो पहललाई “टर्निङ प्वाइन्ट” का रूपमा हेरिएको छ । यदि प्रतिबद्धता कार्यान्वयनमा उतार्न सकिएमा, आगामी वर्षहरूमा एसईई नतिजामा उल्लेखनीय सुधार आउने अपेक्षा गरिएको छ ।