जाजरकोट । जाजरकोटमा अबैध सालको काठ ओसारपसारमा संलग्न एक सवारीधनी पक्राउ परेका छन्।
जिल्ला प्रहरी कार्यालय जाजरकोटले दिएको जानकारीअनुसार आज बिहान करिब ६:०० बजे नेपालगञ्जबाट कालीमाटी हुँदै आठबिसकोटतर्फ गइरहेको भे १ ख २७८३ नम्बरको बसमा अबैध साल प्रजातिको काठ फेला परेको हो।
प्रहरीका अनुसार सुचना प्राप्त भएपछि खटिएको टोलीले भेरी नगरपालिका–१३ कुदुस्थित सुर्खेत–जाजरकोट सडक खण्डमा उक्त बस रोकेर खानतलासी गर्न खोज्दा बस चालक कर्णबहादुर सुनार घटनास्थलबाट फरार भएका थिए।
बसभित्र बिभिन्न साइजका ४७ थान सालका कडी (काठ) फेला पारेपछि प्रहरीले तत्काल काठ र बससहित सवारीधनीलाई नियन्त्रणमा लिएको छ।
पक्राउ परेका व्यक्ति दैलेख, नौमुले गाउँपालिका–१ निवासी ३० वर्षीय प्रकाश बहादुर सुनार रहेका छन्। पक्राउ परेका सुनारसहित बरामद काठ तथा बसलाई आवश्यक कारबाहीका लागि डिभिजन वन कार्यालय, जाजरकोटमा बुझाइएको प्रहरीले जनाएको छ।
घटनाबारे थप अनुसन्धान जारी रहेको प्रहरीको भनाइ छ।
हाम्रो पहुँच संवाददाता । ३ मंसिर २०८२, मंगलवार