जाजरकोट । जाजरकोटमा तीन वटा सरकारी कार्यालयले एउटै भवनबाट सेवा प्रवाह गरिरहेका छन् । कात्तिक १७ को जाजरकोट भूकम्पले भाडामा बस्दै आएको घर भत्किएपछि नापी कार्यालय, मालपोत कार्यालयले भेरी नगरपालिका–४, बोहरागाउँस्थित शिक्षा विकास तथा समन्वय ईकाइको भवनबाट सेवा दिइरहेका छन् ।

जुनीचाँदे गाउँपालिका–२ का भीमप्रसाद न्यौपानेले एउटै भवनबाट तीन वटा कार्यालयले सेवा प्रवाह गरेपछि सेवाग्राहीलाई समस्या हुने गरेको बताए । उनका अनुसार गर्मी समय सुरु हुन थालेकाले बाहिर बस्न सक्ने अवस्था छैन । फराकिलो ठाउँ नभएपछि झ्यालबाट फाँटवाला कर्मचारीलाई सोध्नुपर्छ ।

शिक्षा विकास तथा समन्य एकाइ जाजरकोटका प्रमुख रमेश मल्लका अनुसार तीन वटा कार्यालयले एउटै भवनबाट सेवा दिने भएकाले कुन कार्यालयमा सेवा लिन सेवाग्राही आएका हुन् भन्ने थाहा नपाउने र सेवाग्राहीसमेत अलमलमा पर्ने बताए ।

मालपोत कार्यालयका प्रमुख डिल्ली केसीका अनुसार भूकम्पअघि छ वटा कोठाबाट सेवा प्रवाह गरेको कार्यालयले भूकम्पपछि दुई वटा कोठाबाट सेवा दिँदै आएको छ । स्रेस्ता, मोठ लगायत जनताका महत्वपूर्ण कागजात एउटा कोठामा थन्क्याइएको छ । अहिले दुई वटा कोठाबाट सेवा प्रवाह गरिँदै आएको छ ।

सरकारी कार्यालयका लागि पर्याप्त कोठा नभएपछि कठिन अवस्थामा जनताले मालपोत कार्यालयबाट पाउने सेवा पाएका छन् । सेवाग्राहीले सेवा लिन आएपछि खुला स्थानमा बस्नु परेको छ ।

भूकम्पअघि भाडाको घरबाट पाँच वटा कोठाबाट सेवा प्रवाह गरेको नापी कार्यालय भूकम्पपछि शिक्षा विकास तथा समन्वय एकाइ कार्यालयका दुई वटा कोठाबाट सेवा प्रवाह गर्दै आएको छ । तीन वटा सरकारी कार्यालयले एउटै भवनबाट सेवा प्रवाह गर्दा कार्यालयलाई मात्र नभई सेवाग्राहीलाई समेत असहज भएको शिक्षा विकास तथा समन्वय इकाइ प्रमुख मल्लले बताए ।