जाजरकोट — जाजरकोट जिल्ला अदालतले आर्थिक वर्ष २०८१/८२ मा ऐतिहासिक उपलब्धि हासिल गर्दै दर्ता भएका मुद्दामध्ये ८० प्रतिशत फछर्यौट गरेको छ । वार्षिक ७५ प्रतिशतको लक्ष्य पार गर्दै अदालतले ४ सय ११ मध्ये ३ सय ३१ मुद्दा टुंग्याएको हो ।

सर्वाधिक सम्बन्ध विच्छेदका १ सय ९८ मुद्दामध्ये १ सय ७२ फछर्यौट भएका छन् भने अंशबण्डा, सम्पत्ति, करणी, चोरी, विवाहसम्बन्धी र गालीबेइज्जतीजस्ता मुद्दामा पनि उल्लेखनीय प्रगति भएको छ ।

कैद सजाय र जरिवानामा पनि अदालतले उत्कृष्ट कार्यसम्पादन देखाएको छ । ६ सय ४७ वर्ष २ महिना १५ दिन कैद सजाय कायम हुँदा ३ सय ६६ वर्ष ३ महिना १ दिनको सजाय कार्यान्वयन भइसकेको छ । त्यस्तै, १ करोड ५० लाख २० हजार ७७५ रुपैयाँ जरिवाना कायम गर्दै ३६ लाख १५ हजार ८६२ रुपैयाँ फछर्यौट भएको छ ।

स्रेस्तेदार इन्द्र बहादुर कार्कीका अनुसार, यो उपलब्धिमा जिल्ला न्यायाधीश श्यामलाल घिमिरेको नेतृत्व र सक्रियताले निर्णायक भूमिका खेलेको छ । वैतनिक वकिल भिम बहादुर सिंहले पनि न्यायिक कार्यक्षमतामा देखिएको प्रगतिको प्रशंसा गरेका छन् ।

जाजरकोट जिल्ला अदालतले देखाएको यो प्रदर्शनले स्थानीय न्यायिक सेवाप्रति जनविश्वास अझ बढाएको देखिन्छ ।