मुगु । जिल्लाको पर्यटकीय गन्तव्य राराको दोस्रो सर्वेक्षण कार्य सुरु गरिएको छ । २०५४ साल राराको पहिलो सर्वेक्षण गरिएकोमा २५ वर्षपछि पुन: सर्वेक्षण कार्य सुरु भएको रारा रारा राष्ट्रिय निकुञ्ज कार्यालयले जनाएको छ ।
जल तथा मौसम विज्ञान विभागको आर्थिक सहयोगमा कार्ड इ–टु सर्भिस जेड जेभी प्रालिले भदौ दोस्रो सातादेखि राराको गहिराई, लम्बाई, चौडाइ क्षेत्रफल, तालको पानीको गुणस्तर शुद्धता तथा खोलानालाबाट तालमा मिसिने पानीको ल्यापटेष्ट कार्य सुरु गरिएको रारा राष्ट्रिय निकुञ्ज संरक्षण अधिकृत बद्रीविनोद दाहालले कान्तिपुरलाई बताए ।
रारा सर्वेक्षणका लागि विभागबाट २ जना र प्रालिबाट ८ जना गरी १० जनाको टोली रारामा खटिएको छ । तालको भू–भाग क्षेत्रफल मापनको निम्ति टोपोग्राफिक र गहिराई नाप्न प्रयोग गरिएको कार्ड इ–टु सर्भिस जेड जेभी प्रालिका इन्जिनियर राम श्रेष्ठले जनाए ।
इन्जिजियर श्रेष्ठका अनुसार रारातालको सर्वेक्षण नयाँ-नयाँ प्रविधिद्वारा गरिएको छ । २०५४ सालपछि दोस्रो सर्वेक्षण कार्यले तालको गहिराई लम्बाई, चौडाइ र पानीको शुद्धता वास्तविक जानकारी हुने निकुञ्जको भनाइ छ । प्रालिले सर्वेक्षण पूरा गरिसकेपछि प्रतिवेदन तयारी गरी जल तथा मौसम विज्ञान विभागलाई बुझाउने भएको छ ।
प्रथम सर्वेक्षणबमोजिम रारा तालको गहिराई १ सय ६७ लम्बाई ५ किलोमिटर र चौडाइ ३ किलोमिटर र कुल क्षेत्रफल १०.८ वर्ग किलोमिटर रहेको निकुञ्ज अधिकृत दाहालले सुनाए ।
समुद्री सतहदेखि २९ सय २९ मिटर उचाइमा अवस्थित राराको राष्ट्रिय निकुञ्ज मध्यवर्ती क्षेत्रमा मुगुको छायानाथरारा नगरपालिका सोरु, खत्याड गाउँपालिका र जुम्लाको कनका सुन्दरी गाउँपालिकको भूभाग ओटेको छ ।
। २५ भाद्र २०७९, शनिबार