जाजरकोट । जाजरकोट खलंगाको रातो दरवार प्रांङ्गणमा कविता वाचन प्रतियोगिता हुने भएको छ । नेपाली साहित्यका आदिकवि तथा राष्ट्रिय विभुति भानुभक्त आचार्यको २०९ औं जन्म जयन्तीको अवसरमा असार २९ गते लयमा कविता वाचन प्रतियोगिताको आयोजना हुन लागेको हो ।
जाजरकोट सम्पदा संरक्षण प्रतिष्ठानको आयोजनामा खलंगाको पहिलो दरवार रातो दरवारको प्रांङ्गणमा खुला कविता वाचन प्रतियोगिता हुन लागेको हो । आदिकवि भानुभक्त प्रति सम्मान तथा सम्झना व्यक्त गर्न र जिल्लामा साहित्य एवं कलाको संरक्षणमा टेवा पुर्याउन लयमा कविता प्रतियोगिताको आयोजना गरिएको जाजरकोट सम्पदा संरक्षण प्रतिष्ठानका अध्यक्ष जनक केसीले वताए ।
उनले असार २९ गते लयमा कविता प्रतियोगिताका साथै भानु र घाँसीको सम्वाद वारेको लघुनाटक पनि मञ्चन गरिने जानकारी दिए । प्रतिष्ठानका अध्यक्ष केसीका अनुसार लयमा कविता वाचन प्रतियोगितामा प्रथम हुनेलाइ नगद रु ६ हजार र प्रमाणपत्र, द्धितीय हुनेलाइ ४ हजार नगद र प्रमणपत्र, तृतीय हुनेलाइ २ हजार ५ सय नगद र प्रमाणपत्र तथा सान्त्वना हुने एक जनालाइ १ हजार ५ सय नगद र प्रमाणपत्र वितरण गरिने छ ।
कविता प्रतियोगितामा सहभागि हुन चहानेहरुले असार २८ गते दिउसो ३ वजे भित्र आफनो नाम दर्ता गराउनु पर्ने गरि सार्वजनिक सुचना जारी गरिएको प्रतिष्ठानका अध्यक्ष केसीले वताए । जाजरकोटको इतिहास, साहित्य, कला, सँस्कृति, भाषा, भेषभुषा, मौलिकता र प्राकृतिक सम्पदाहरुको संरक्षणको लागि जिल्लावासी लगाएत सवै सरोकारवालाहरुको पहल जुटाउने उद्देस्यले भर्खरै स्थापना भएको प्रतिष्ठानले आफनो पहिलो कार्यक्रमको रुपमा भानुभकत आचार्यको जन्मजयन्तीको अवसरमा लयमा कविता वाचन प्रतियोगिता आयोजना गरेको वताइएको छ ।
सो कार्यक्रममा प्रतिष्ठानको परिचय तथा उद्देस्यवारे सवैलाइ जानकारी दिने कार्यक्रम समेत रहेको आयोजकको भनाइ छ । इतिहास, कला, सँस्कृति, साहित्य, भाषा तथा भेषभुषाको मौलिकतामा जाजरकोट निकै वैभवशाली भएपनि यसको संरक्षण र नयाँ पुस्तामा हस्तान्तरण गर्न खासै पहल हुन नसकेको स्थानीय सरोकारवालाहरु वताउछन् ।
। १८ असार २०७९, शनिबार