जाजरकोट । पेट्रोलियम पदार्थ र दैनिक उपभोग्य बस्तुको मुल्यवृद्धिका विरुद्ध जाजरकोटमा विरोध प्रर्दशन गरिएको छ । नेकपा एमाले निकट विद्यार्थी संगठन अनेरास्ववियु र यूवा संघले विरोध प्रर्दशन गरेका हुन् । विरोध प्रर्दशन अन्तर्गत बुधबार जिल्ला प्रशासन कार्यालय जाजरकोटमा धर्ना कार्यक्रम गरिएको छ ।
प्रशासनको परिसरमा टाउकोमा कालो पट्टी बाँधेर आधा घण्टा सम्म धर्ना कार्यक्रम गरिएको अनेरास्ववियुका केन्द्रीय सदस्य दिनेश गौमतले जानकारी दिए । पेट्रोलियम पदार्थ दैनिक उपभोग्य वस्तुमा लगाएको मुल्यवृद्धि खारेज गर, देउवा सरकार मुर्दावाद, जनतालाई दुःख दिन पाईदैन्, नालायक सरकार चाहिदैन् लगायतका नारा लगाएका थिए ।
धर्ना कार्यक्रम पछि जनताको बोलीलाई प्रमुख जिल्ला अधिकारी मार्फत नेपाल सरकार समक्ष मागहरु राखेको यूवा संघका नेपालका केन्द्रीय सदस्य विश्वविक्रम शाहले बताए ।
उनले भने, ‘जिल्ला प्रशासन कार्यालयमा शान्तिपूर्ण धर्ना कार्यक्रम गरियो, जनताका आवाजलाई प्रजिअ मार्फत नेपाल सरकार समक्ष राखियो ।’ सरकारले बढाएको मुल्य वृद्धिका विरुद्ध अनेरास्ववियु र यूवा संघ नेपालले विरोध गरिरहेको छ । मंगलबार राँको जुलस सहित विरोध प्रर्दशन गरेको थियो भने विहीबार जाजरकोटमा चल्ने सरकारी सवारी साधन सुरक्षा र स्वास्थ्य बाहेक सबै सरकारी सवारी साधनहरू बन्द गरिने कार्यक्रम रहेको समेत शाहले बताए । निजी तथा सार्वजनिक यातायात भने सञ्चालन गर्न पाइने छ ।
उक्त कार्यक्रममा राष्ट्रिय युवा संघ स्थायी कमिटी सदस्य विश्व शाह, अनेरास्ववियुका केन्द्रिय सदस्य दिनेश गौतम, जिल्ला अध्यक्ष बिबश भारती, युवा जिल्ला नेत्री मधु मिता शाक्य लगायतको उपस्थिति रहेको थियो ।
। ८ असार २०७९, बुधबार