लियोनेल मेस्सी पेरिस सेन्ट जर्मेन फर्किँदा समर्थकहरूले उनलाई स्वागत गर्ने क्रिस्टोफर गाल्टियरले विश्वास व्यक्त गरेका छन् ।
हालै सम्पन्न विश्वकप फाइनलमा अर्जेन्टिनी कप्तानले दुई गोल गर्नुका साथै पेनाल्टी सुटआटमा गोल गर्दै फ्रान्सको लगातार दुईपटक उपाधि जित्ने सपना चकनाचुर पारेका थिए । विश्वकप जितेपछि अर्जेन्टिनामा खुसीयाली मनाउँदा अर्जेन्टिनी खेलाडीहरूले फ्रान्सका खेलाडीहरूको मजाक उडाएका थिए । जसमा पीएसजीमा मेस्सीका सहकर्मीहरू पनि रहेका थिए ।
मेस्सीका विश्वकपपछि मेस्सी हाल बिदामा रहेका छन् । पीएसजी उनी फर्कने प्रतीक्षामा रहेको छ । क्लबका म्यानेजर गाल्टियरलाई पत्रकारहरूले प्रश्न गरेका थिए, ‘के फ्रान्सका समर्थकहरू मेस्सीसँग रुष्ट छन् त ?’ जवाफमा गाल्टियरले मेस्सीलाई पीएसजीका समर्थकहरूले स्वागत गर्ने विश्वास व्यक्त गरे । उनले भने, ‘मलाई यकिन छ पार्क डेस प्रिन्सेसमा मेस्सीलाई स्वागत गरिनेछ । उनले भर्खरै विश्वकपको सबैभन्दा सुन्दर ट्रफी जितेका छन् । यो सिजनको सुरुवातदेखि उनले क्लबका लागि कस्तो योगदान दिएका छन् भन्ने पनि बिर्सनु हुँदैन ।’ उनले मेस्सी जनवरी ३ मा क्लबमा फर्कने पनि जानकारी दिए ।
। १८ पुष २०७९, सोमबार