काठमाडौं । गोला प्रक्रियाबाट इजलास तोक्न सुरु गर्ने मितिबारे निर्णय गर्न सर्वोच्च अदालतको पूर्ण  (फुलकोर्ट) बैठक आज बस्दैछ ।

हिजो १८ न्यायाधीशबीच भएको छलफलले मंसिर १५ देखि गोला प्रक्रिया सुरु गर्ने सहमति गरेको थियो । सहमति अनुमोदन गरी निर्णय गर्न आज फुलकोर्ट बैठक बोलाइएको हो । गोला प्रक्रियाद्वारा इजलास गठनका लागि प्रशासनिक र प्राविधिक तयारी पूरा भइसकेको छ ।

१८ जना न्यायाधीशको निर्णय बमोजिम मुख्य रजिष्ट्रार लालबहादुर कुँवरले फुलकोर्टका लागि समन्वय गर्नेछन् । सामान्य अवस्थामा प्रधानन्यायाधीशको निर्देशन बमोजिम मुख्य रजिस्ट्रारले फुलकोर्ट बोलाउनुपर्नेमा अहिले प्रधानन्यायाधीश चोलेन्द्र शमशेर जबराको नेतृत्व अस्वीकार गर्दै आएका न्यायाधीशहरूले फुलकोर्ट बोलाउने निर्णय गरेका हुन् ।

उनीहरुले आज फुलकोर्ट बस्नुअघि नेपाल बार एशोसिएसन र सर्वोच्च अदालत बारका अध्यक्षद्वय चण्डेश्वर श्रेष्ठ र पूर्णमान शाक्यसँग पनि छलफल गर्दैछन् । प्रधानन्यायाधीश जबराको राजीनामा माग गर्दै इजलास बहिस्कार गर्दै आएका न्यायाधीशहरूले गोला प्रक्रियाद्वारा पेसी तोक्ने सुनिश्चित भएपछि इजलास फर्किन लागेका हुन । नेपाल बार भने प्रधानन्यायाधीश जबराको राजीनामा बाहेकमा आफ्नो सहमति नरहने जनाउँदै निरन्तर आन्दोलनमा छ ।

रामशाहपथदेखि बालुवाटारसम्म मार्चपास

यसैबीच नेपाल बार एसोसिएसनलगायत विभिन्न पेसागत संगठनको सहभागितामा आज सर्वोच्च अदालतदेखि बालुवाटारसम्म मार्चपास गरिने भएको छ। बारका अध्यक्ष चण्डेश्वर श्रेष्ठका अनुसार प्रधानन्यायाधीश चोलेन्द्रशम्शेर जबराविरुद्ध हुने उक्त मार्चपासमा सबै पेसागत संगठनका साथै सर्वसाधारणको पनि सहभागिता रहने छ ।

दिउँसो २ बजे सर्वोच्च अदालतदेखि बालुवाटारसम्म मार्चपास गर्ने तयारी छ। बारले प्रधानन्यायाधीशलाई महाभियोग लगाउनका लागि दलहरूलाई धारणापत्र बुझाइसकेको छ । यस्तै हिजो १८ वटा उच्च अदालतमा विरोध सभा गरेको थियो ।