भौगोलिक रुपमा दुर्गम भए पनि प्रकृतिले जाजरकोटलाई ठगेको छैन । उसो त मध्यपश्चिममै जाजरकोट जिल्ला जैविक विविधताले भरीपूर्ण मानिन्छ । जिल्ला सदरमुकाम खलंगा सँग जोडिएको ढिमे गाविस जिल्लाका अन्य गाविस जस्तै प्राकृतिक सम्पदाले धनी मध्येको एक हो । ढिमे १ पाँचकाटिया र खलंगा ७ तिमिलेको सिमानाका रुपमा रहेको पाँचकाटिया आन्तरिक पर्यटनका लागि आकर्षक गन्तब्यका रुपमा विकसित हुदै गएको छ । २४ सय मीटरको उचाईमा रहेको यो स्थानबाट देखिने लेकाली तथा हिमाली दृष्य हेर्न र चिसो हावामा रमाउदै पिकनिक खानका लागि यो स्थान आन्तरिक पर्यटकका लागि गन्तब्यको रुपमा लोकप्रिय बन्न थालेको हो । गत वर्ष देखि सदरमुकाम खलंगा देखि पाँचकाटिया सम्म जीप चल्न थाले पछि यहाँको आन्तरिक पर्यटनमा चहलपहल बृद्धी भएको छ ।